Ka përfunduar numërimi në 12 komuna – disa fitore pa balotazh, të tjerat drejt garës së dytë

Komisioni Qendror i Zgjedhjeve ka bërë të ditur se ka përfunduar numërimi i votave në 12 komuna të Kosovës: Deçan, Gjilan, Dragash, Fushë-Kosovë, Obiliq, Vushtrri, Junik, Mamushë, Graçanicë, Ranillug, Partesh dhe Kllokot.

Në disa prej tyre tashmë janë konfirmuar fituesit pa balotazh, ndërsa në të tjerat gara do të vazhdojë në rundin e dytë.

Në Deçan, Bashkim Ramosaj nga AAK ka siguruar mandatin e ri për kryetar komune pa balotazh.
Në Gjilan, pritet balotazh mes Alban Hysenit të LVV-së dhe Arbër Ismajlit të LDK-së.
Në Dragash, garën e dytë do ta zhvillojnë Bexhet Xheladini i LDK-së dhe Shaban Shabani i PDK-së.
Në Fushë-Kosovë, balotazhi do të jetë mes Valon Prebezës të LVV-së dhe Besnik Osmanit të LDK-së.
Në Obiliq, Xhafer Gashi i LDK-së do të përballet në balotazh me Halil Thaçin e LVV-së.
Në Vushtrri, garën e dytë do ta zhvillojnë Feriz Idrizi i PDK-së dhe Sylejman Meholli i LVV-së.
Në Junik, pritet balotazh mes Ruzhdi Shehut të LDK-së dhe Agron Kuçit të AAK-së.

Ndërkohë, në Mamushë, Abulhadi Krasniç nga KDTP ka fituar mandatin e kryetarit pa balotazh.

Në komunat me shumicë serbe – Graçanicë, Ranillug dhe Partesh – fitues pa balotazh janë kandidatët e Listës Serbe.
Në Kllokot, Bozhidar Dejanoviq i Listës Serbe do të përballet në balotazh me Srecko Spasiqin e Srpska Narodna Sloga.

Rezultatet janë preliminare dhe pritet të konfirmohen nga KQZ pas përfundimit të të gjitha procedurave zyrtare.